mere dil men to har zaman ho tum
chashm-e-zahir se kyuun nihan ho tum
be-vafaen ka aib kaisa hai
ye to sach hai ki meri jaan ho tum
jab chalo titar hi ki chalte ho
mere haq men to asman ho tum
dil-o-din donon nazr karta huun
aisi chizon ke qadr-dan ho tum
dekh ghamgin mujhe bigadte ho
par-le darje ke bad-guman ho tum
arsh-paimai-e-khayal abas
kaun pahuncha vahan jahan ho tum
baat men dil ko khinch lete ho
kis qayamat ke khush-bayan ho tum
hai saval aur aur javab hai aur
sach kaho is ghadi kahan ho tum
bachiye aghyar ki nazar na lage
chashm-e-bad-dur naujavan ho tum
dushmani ham karen to kis kis se
ek aalam pe mehrban ho tum
zulf ke baar se kamar lachke
kis qadar nazuk ai miyan ho tum
dekhne ki majal hai kis ko
misl-e-khurshid go ayaan ho tum
hai vahi thiik jo kaho ‘majruh’
kyuun na ho sahab-e-zaban ho tum
Leave a Reply