agar hai zindagi ik jashn to na-mehrban kyon hai
fasurda rang men Duubi hui har dastan kyon hai
tumhen ham se mohabbat hai hamen tum se mohabbat hai
ana ka da.era phir bhi hamare darmiyan kyon hai
vahi sab kuchh raza us ki to phir dil men guman kyon hai
savalon aur javabon se pareshan meri jaan kyon hai
har ik manzar ke pas-manzar men tera hi karishma hai
yaqinan ḳhaliq-e-kun tu to ankhon se nihan kyon hai
tujhi ko hai mayassar har bura.i ka daman karna
to na-insafiyon ke daur men tu be-zaban kyon hai
Leave a Reply