chal rahe hain vo aisi shaan se aaj
jaise aae hon asman se aaj
astin men jo un ki tha kal tak
tiir nikla hai vo kaman se aaj
shama ke ird-gard parvane
haath dhoen na apni jaan se aaj
apna sab kuchh luta ke hosh aaya
shaikh-ji mil rahe hain khaan se aaj
gul khilaenge kya abhi kuchh aur
lag rahe hain vo mehrban se aaj
kar rahe hain jo vada-e-farda
phir gae apni vo zaban se aaj
na mita de vo un ka nam-o-nishan
aah nikli hai jo zaban se aaj
bhuul baithe hain apni jo auqat
gir paden vo na asman se aaj
kah rahe hain vo aa ke ‘barqi’ se
jaao niklo mire makan se aaj
Leave a Reply