Qamar Jalalvi
barish men ahd toḌ ke gar mai-kashi hui
tauba mari phiregi kahan bhigti hui
pesh aa.e laakh ranj agar ik ḳhushi hui
parvardigar ye bhi koi zindagi hui
achchha to donon vaqt mile kosiye huzur
phir bhi mariz-e-gham ki agar zindagi hui
ai andalib apne nasheman ki ḳhair maang
bijli ga.i hai su-e-chaman dekhti hui
dekho charagh-e-qabr use kya javab de
aa.egi sham-e-hijr mujhe puchhti hui
qasid unhin ko ja ke diya tha hamara ḳhat
vo mil ga.e the un se koi baat bhi huii?
jab tak ki teri bazm men chalta rahega jaam
saaqi rahegi gardish-e-dauran ruki hui
maana ki un se raat ka va.ada hai ai ‘qamar’
kaise vo aa sakenge agar chandni hui
Leave a Reply