koi nashsha na koi ḳhvab ḳharid
tira-baḳhti hai mahtab ḳharid
hai muzayyan dukan-e-la-adri
sau savalon ka ik javab ḳharid
kisa-e-tamma men chhupa dinar
phir bila ḳhauf ehtisab ḳharid
baḌi mabsut hai kitab-e-ḳhalq
koi achchha sa intiḳhab ḳharid
tujh men hai bahr-e-be-karan ka vajud
tujh se kis ne kaha habab ḳharid
tota-chashmi ke aib se hai paak
shakl bad hi sahi ghurab ḳharid
tab kahin ja ke hoga tu ‘ghalib’
asadullah ka ḳhitab ḳharid
madah-ḳhvan hoga har varaq ‘rahi’
sirf ik lafz-e-intisab ḳharid
Leave a Reply