Sahar Ansari
na dosti se rahe aur na dushmani se rahe
hamen tamam gile apni agahi se rahe
vo paas aa.e to mauzu-e-guftugu na mile
vo lauT jaa.e to har guftugu usi se rahe
ham apni raah chale log apni raah chale
yahi sabab hai ki ham sargiran sabhi se rahe
vo gardishen hain ki chhuT jaa.en ḳhud hi baat se haat
ye zindagi ho to kya rabt-e-jan kisi se rahe
kabhi mila vo sar-e-rahguzar to milte hi
nazar churane laga ham bhi ajnabi se rahe
gudaz-qalb kahe koi ya ki harja.i
ḳhulus o dard ke rishte yahan sabhi se rahe
Leave a Reply