raha vo jirga jise char gai hai angrezi
so vaan khuda ki zarurat na ambiya darkar
vo aankh miich ke bar-khud ghalat bane aise
ki asia ki har ik chiiz par padi dhutkar
jo poshishon men hai poshish to pas-darida-coat
savariyon men savari to dum-kata rahvar
jo ardali men hai kutta to haath men ik bed
bajate jaate hain siiti sulag raha hai sigar
vo apne-ap ko samjhe hue hain gentleman
aur apni qaum ke logon ko jante hain gavanr
na kuchh adab hai na akhlaq ne khuda-tarsi
gae hain un ke khayalat sab samundar paar
vo apne zoam men liberal hain ya radical hain
magar hain qaum ke haq men ba-surat-e-aghyar
na india men rahe vo na vo bane english
na un ko charch men honor na masjidon men baar
na koi alam na sanat na kuchh hunar na kamal
tamam qaum ke sar par savar hai adbar
Leave a Reply