Faisal Ajmi
shamiyanon ki vazahat to nahin ki ga.i hai
aaj ḳhairat hai davat to nahin ki ga.i hai
dekhti hai hamen duniya use roka jaa.e
saath rahte hain mohabbat to nahin ki ga.i hai
ham ne kaasa hi baḌhaya hai dua dete hue
dar-ba-dar ja ke shikayat to nahin ki ga.i hai
rasta hai ise milne ki jagah kahte hain
aap se milne ki zahmat to nahin ki ga.i hai
aaj phir a.ina dekha hai ka.i saal ke baad
kahin is baar bhi ujlat to nahin ki ga.i hai
pahli dhaḌkan hi miyan vazan men thi shukr karo
sha.iri aaj inayat to nahin ki ga.i hai
Leave a Reply