Noor Bijnauri
vahi mohtasib ki malamaten vahi ek vazeh hasin miri
vahi rang rang subu mira vahi daagh daagh jabin miri
tira shahr shahr-e-ajib hai yahan kaun hai jo gharib hai
koi kah raha hai falak mira koi kah raha hai zamin miri
miri hasraton ke dayar men tiri justuju se bahar hai
tira naqsh-e-pa hai jahan kahin hai jabin-e-shauq vahin miri
isi a.ine men kiran kiran kisi hur-vash ki tajalliyan
yahi dil hai jam-e-jahan-numa yahi dil hai ḳhuld-e-barin miri
ka.i aftab ka.i qamar mire soz-e-dil se hain nur-gar
ki misal-e-sham.a sulag rahi hai azal se jan-e-hazin miri
mire ansuon ne kaha na tha ki bichhaḌ ke phir na milenge ham
tujhe yaad ho ki na yaad ho vo nigah-e-baz-pasin miri
Leave a Reply