Basit Bhopali
un ka barbad-e-karam kahne ke qabil ho gaya
dard pahlu men jahan bhi tha vahin dil ho gaya
barha dekha hai dil ne o mire mahv-e-ḳhiram
hashr uTTha aur tire qadmon men shamil ho gaya
dil jahan uchhla faza-e-do-jahan par chha gaya
arsa-e-kaunain jab simTa mira dil ho gaya
be-ḳhabar rahna hi achchha is jahan-e-ghair men
miT gaya jo vaqif-e-adab-e-mahfil ho gaya
jo nigah-e-shauq uTThi husn ban kar rah ga.i
jo qadam ham ne uThaya naqsh-e-manzil ho gaya
ya kabhi manzil thi maqsud-e-mazaq-e-justuju
ya mazaq-e-justuju maqsud-e-manzil ho gaya
haa.e ‘basit’ ye mire ḳhun-e-tamanna ka asar
aur bhi rangin kuchh daman-e-qatil ho gaya
Leave a Reply