bar taraf kar ke takalluf ik taraf ho ja.iye
mustaqil mil ja.iye ya mustaqil kho ja.iye
kya gile shikve ki kis ne kis ki dildari na ki
faisla kar hi liya hai aap ne to ja.iye
meri palken bhi bahut bojhal hain gahri niind se
raat kaafi ho chuki hai aap bhi so ja.iye
aap se ab kya chhupana aap koi ghair hain
ho chuka huun main kisi ka aap bhi ho ja.iye
maut ki aghosh men girya-kunan hai zindagi
aa.iye do chaar aansu aap bhi ro ja.iye
sha.iri kar-e-junun hai aap ke bas ki nahin
vaqt par bistar se uThiye vaqt par so ja.iye
Leave a Reply