palaT Kar Ashk Su-E-Chashm-E-Tar Aata Nahin Hai

Khursheed Rizvi

palaT kar ashk su-e-chashm-e-tar aata nahin hai

ye vo bhaTka musafir hai jo ghar aata nahin hai

qafas ab ashiyan hai ḳhaak par likkhi hai rozi

kabhi dil men ḳhayal-e-bal-o-par aata nahin hai

pahaḌon ki siyahi se fuzun dil ki siyahi

vo husn ab apni ankhon ko nazar aata nahin hai

shajar barson se naqsh-e-ra.egan ban kar khaḌe hain

koi mausam ho shaḳhon men samar aata nahin hai

mire is avvalin ashk-e-mohabbat par nazar kar

ye moti siip men phir umr-bhar aata nahin hai

koi qatil ravan hai meri shiryanon men ‘ḳhurshid’

jo mujh ko qatl karta hai nazar aata nahin hai