Poet
agar dil ishq ke anvar se ma.amur ho jaa.e
to phir ye zarra ḳhud rashk-e-charagh-e-tur ho jaa.e
tum apne jalva-e-nauḳhez par yuun naaz karte ho
agar mera dil-e-ḳhuddar bhi maghrur ho jaa.e
faqat is raaz ko ahl-e-mohabbat hi samajhte hain
mayassar aa.e jitna qurb itna duur ho jaa.e
mujhe ye zid ki un ke ru-e-zeba se naqab uTThe
unhen ye zid ki jalva aur bhi mastur ho jaa.e
vo mere dil ke gulshan men agar aa jaa.e ai ‘jauhar’
to har ik na-shagufta ghuncha rang-o-nur ho jaa.e
Leave a Reply