Sajjad Baqar Rizvi
kya ishq ka len naam havas aam nahin hai
andhon ko andhere men koi kaam nahin hai
tha jaam to is aas pe baiThe the ki mai aa.e
mai aa.i to rindon ke liye jaam nahin hai
jiite ho to jiine ka evaz ziist se mango
maut apna muqaddar hai ye in.aam nahin hai
kaT ja.egi ye raat guzaro kisi karvaT
ab sub.h se pahle to koi shaam nahin hai
jiite the ki sar-e-dosh pe tha bar-e-garan tha
marte hain ki sar par koi ilzam nahin hai
yaan raushani-e-sub.h to vaan nik.hat-e-gul hai
yuun husn-e-gurezan ka koi naam nahin hai
ḳhud vaqt ko milta hai sukun teri gali men
sunte hain vahan gardish-e-ayyam nahin hai
saaya huun magar mehr-e-daraḳhshan se hai nisbat
zulmat huun par andhon se mujhe kaam nahin hai
‘baqar’ se nahin izzat-e-sadat pe kuchh harf
ashiq to bana phirta hai badnam nahin hai
Leave a Reply