tujh se ai ziist hamen jitne hasin ḳhvab mile
naqsh-bar-ab kabhi surat-e-simab mile
ham ne har mauj-e-havadis ko kinara samjha
ham ko har mauj men lipTe hue girdab mile
gardish-e-vaqt ne gahna diye kitne suraj
sub.h ki god men dam toḌte mahtab mile
jab bhi sadiyon ki futuhat ko muḌ kar dekha
ḳhuun men luThḌe hue tariḳh ke abvab mile
sail-e-zulmat men hai qafila-e-manzil-e-shab
kaash aise men koi najm-e-ufuq-tab mile
ahal-e-kirdar ko dekha hai sar-e-dar aksar
ahal-e-guftar tah-e-saya-e-mehrab mile
fasl-e-gul aa.i hai yaaro to ghanimat jaano
phuul afsurda sahi zaḳhm to shadab mile
dil ke har daagh se vabasta hai rudad-e-sitam
ranj baḌhta gaya juun juun mujhe ahbab mile
mujh ko ‘aḳhtar’ na mili nala-e-shab-gir ki daad
qarya-e-shauq ke sab log garan-ḳhvab mile
Leave a Reply