Nasreen Naqqash
ham ne honTon pe tabassum ko saja kar dekha
ya.ani zaḳhmon ko phir ik baar hara kar dekha
saari duniya men nazar aane lage tere nuqush
parda jab chashm-e-basirat se uTha kar dekha
duur phir bhi na hui qalb-o-nazar ki zulmat
ham ne ḳhuun apna charaghon men jala kar dekha
apna chehra nazar aaya mujhe us chehre men
is ke chehre se jo chehre ko haTa kar dekha
vo ta.alluq tiri ik zaat se jo tha mujh ko
us ta.alluq ko bahar-e-hal nibha kar dekha
barf hi barf nazar aati hai ta-hadd-e-nazar
zindagi ham ne tiri khoj men ja kar dekha
javedan ho gaya har naghma-e-pur-dard mira
mere honTon se zamane ne chura kar dekha
Leave a Reply