mud kar pichhe dekh rahi huun
kya kya kuchh virse men mila tha
aur kya kuchh main chhod rahi huun
mera ghar tufan-zada tha
mere buzurgon ne dekha tha
vo ifrit-e-vaqt ki jis ne
un se sab kuchh chhin liya tha
phir bhi kya kuchh mujh ko mila tha
chehron par mehnat ki chamak thi
ankhon men ghairat ki damak thi
haath men haath dhare the kaise
khali haath bhare the kaise
mil-jul kar rahne ki ravish thi
zinda rahne ki khvahish thi
ye sab kuchh us ghar se mila tha
vo ghar jo ik khali ghar tha
main ne ek bhare kumbe men
apne hanste-baste ghar men
khauf ka virsa chhod diya hai
rishta-e-jurat tod diya hai
lahjon men lafzon ki bachat hai
qurbat men kitni vahshat hai
apni khushiyan apne angan
apne khilaune apne daman
mud kar pichhe dekh rahi huun
kya kya kuchh virsa men mila tha
aur kya kuchh main chhod rahi huun
Leave a Reply