Kiya Hai Ishq Ne Aazad Do-Jahan Se Hamein

kiya hai ishq ne azad do-jahan se hamen

na kuchh yahan se gharaz hai na kuchh vahan se hamen

khudi ko bhuul ke mast-e-alast ho jaana

mila hai faiz ye khum-khana-e-mughan se hamen

azaan haram men hai naqus hai kunisht men to

sadaen aati hain teri kahan kahan se hamen

phir aaj uttha hai vo parda-e-hijab kahin

shuaen si nazar aati hain kuchh yahan se hamen

misal-e-shama hain sab rat-bhar ke ye jalve

sahar ko uthna hai is mahfil-e-jahan se hamen

mita ke hasti-e-mauhum tujh ko paaya hai

pata mila hai tira khak-e-be-nishan se hamen

chaman se uth gaya ‘raunaq’ jab ashiyan apna

na phir bahar se matlab na kuchh khizan se hamen

Leave a Comment