Naseer Ahmad Nasir
chhanv piiti hai dhuup khati hai
shab sada ki chuḌail jaati hai
ik sitare pe aan baiThe hain
haath men chand ki chapati hai
aur kuchh ho na ho zamane men
ek daa.im si be-sabati hai
mere dukh-dard go zamini hain
meri tanha.i ka.enati hai
jhiil ko tairna nahin aata
apne paani men Duub jaati hai
dekh kar ghar ki halat-e-ḳhasta
meri tasvir muskurati hai
ek nalki mahin dhage ki
dast-e-ḳhayyat ko ghumati hai
jine-marne se baaz aate nahin
apni fitrat hi vardati hai
zindagi kitni achchhi teacher hai
zindagi bhar sabaq sikhati hai
ab parindon ko kaun samjha.e
shaḳh-e-chhitnar kaT bhi jaati hai
chalne lagta hai rasta mujh men
meri bachchi qadam uThati hai
ab to hone se kuchh nahin hota
ab to hona bhi nafsiyati hai
dast-e-tariḳh se nikalte hi
jang zehnon men phail jaati hai
aate aate bhi sha.iri ‘nasir’
ik zamane ke ba.ad aati hai
Leave a Reply