ham ne tanha-nashini ḳharidi to hai raunaq o shorish-e-anjuman bech kar
sham.a mehrab-e-dil men jala.i to hai arzuon ka apni kafan bech kar
mutma.in hain bahut aaj arbab-e-fan apna sarmaya-e-fikr-o-fan bech kar
jaise a.ina rakh de koi mah-vash halqa-e-zulf ka bankpan bech kar
kho gaya dard hangama-e-shahr men luT rahi hai dukan-e-mata-e-nazar
ab bhi taufiq agar hai to ahl-e-junun baḌh ke le lo use jaan o tan bech kar
rut badalti rahi rang uḌte rahe kam-nazar baghban kam-nazar hi rahe
ik ḳhayaban ko sairab karte rahe abru-e-bahar-e-chaman bech kar
hai ‘faridi’ ajab rang-e-bazm-e-jahan miT raha hai yahan farq-e-sud-o-ziyan
nuur ki bhiik taron se lene laga aftab apni ik ik kiran bech kar
Leave a Reply