Junun-E-Shauq Mein Mahw-E-Tamasha Ho Gae Hum Tum

junun-e-shauq men mahv-e-tamasha ho ga.e ham tum

mohabbat rang laa.i ḳhuub rusva ho ga.e ham tum

koi monis na hamdam hai na koi raz-dan apna

hujum-e-shauq ke saa.e men tanha ho ga.e ham tum

andheron men bhaTakti hai javani raushni kaisi

ye kya manzil hai mahrum-e-tamanna ho ga.e ham tum

parastar-e-vafa koi nahin bazar-e-ulfat men

ḳharidari nahin jis ki vo sauda ho ga.e ham tum

azal se qismat-e-adam mohabbat se hai vabasta

jahan men kis liye phir aah rusva ho ga.e ham tum

chale the do qadam jab bhi kabhi anjam rahon par

hasin-o-gul-fishan rahon pe shaida ho ga.e ham tum

surur-o-kaif ke aalam men apni hosh kho baiThe

‘nazar’ ki choT kha kar mahv-e-jalva ho ga.e ham tum