ye us ki marzi ki main us ka intiḳhab na tha
vagarna mere muqaddar men kya janab na tha
kuchh is liye tire gulshan se main palaT aaya
tamam phuul vahan the magar gulab na tha
bichhaḌte vaqt hamare labon men chubhne lage
saval aise ki jin ka koi javab na tha
jise bhi chaha use be-hisab chaha ki
hamare dil men miyan sho.aba-e-hisab na tha
gulu-e-ḳhushk se tir-e-sitam ko toḌ diya
ye bachpane ka tha aalam abhi shabab na tha
main ik zamane men ‘hashim-raza’ payambar tha
mohabbaton ka magar sahib-e-kitab na tha
Leave a Reply