butan-e-mah-vash ujdi hui manzil men rahte hain
ki jis ki jaan jaati hai usi ke dil men rahte hain
hazaron daagh pinhan ashiqon ke dil men rahte hain
sharar patthar ki surat un ki ab-o-gil men rahte hain
zamin par paanv nafrat se nahin rakhte pari-paikar
ye goya is makan ki dusri manzil men rahte hain
mohabbat men maza hai chhed ka lekin maze ki ho
hazaron lutf har ik shikva-e-batil men rahte hain
khuda rakkhe salamat jin ko un ko maut kab aae
tadapte lotte ham kucha-e-qatil men rahte hain
hazaron hasraten vo hain ki roke se nahin ruktin
bahut arman aise hain ki dil ke dil men rahte hain
yahan tak thak gae hain chalte chalte tere hathon se
ki ab chhup chhup ke navak sina-e-bismil men rahte hain
na dekhe honge rindon se bhi tu ne paak ai zahid
ki ye be-dagh mai-khane ki ab-o-gil men rahte hain
muhit-e-ishq ki har mauj tufan-khez aisi hai
vo hain girdab men jo daman-e-sahil men rahte hain
khuda rakkhe mohabbat ne kiye abad donon ghar
main un ke dil men rahta huun vo mere dil men rahte hain
jo hoti khub-surat to na chhupti qais se laila
magar aise hi vaise parda-e-mahmil men rahte hain
hamare saae se bachta hai har ik bazm men us ki
hamen dekho ki ham tanha bhari mahfil men rahte hain
suragh-e-mehr-o-ulfat ghair ke dil men na paenge
abas vo raat din is sai-e-be-hasil men rahte hain
buton ko mahram-e-asrar tu ne kyuun kiya ya rab
ki ye kafir har ik khalvat-sara-e-dil men rahte hain
falak dushman hua gardish-zadon ko jab mili rahat
ziyada raah se khatke mujhe manzil men rahte hain
tan-asani kahan taqdir men ham dil-girafton ki
khuda par khuub raushan hai ki jis mushkil men rahte hain
Leave a Reply