duur kya sham.a kabhi rahti hai parvane se
aap kyuun ruuTh ga.e apne hi divane se
jis tarah mai chhalak uTThe kabhi paimane se
aap yuun duur hue apne hi mastane se
pyaar ki aag men jalne ka maza hai kaisa
kya bata.ega koi puchhiye parvane se
mai-kade ki is udasi se pata lagta hai
tishna-lab uTh gaya shayad koi maiḳhane se
raat baaqi hai abhi jaane ki jaldi kya hai
sab chala ja.ega ik tere chale jaane se
lag ga.i kis ki nazar daur-e-taraqqi pe ḳhuda
aaj apne hi nazar aate hain begane se
Leave a Reply