bichhḌe hain kab se qafila-e-raftagan se ham
mil ja.enge kabhi na kabhi karvan se ham
rah rah ke puchhte hain yahi baghban se ham
le jaa.en chaar tinke kahan ashiyan se ham
majbur kis qadar hain dil-e-bad-guman se ham
dekhe koi ki chup hain khaḌe be-zaban se ham
allah re uruj-e-taḳhayyul ke hausle
chal kar makan se baḌh ga.e kuchh la-makan se ham
bad-e-ḳhizan ne rang-e-chaman kya uḌa diya
aḳhir ko nikle ḳhak-basar bostan se ham
kis munh se haath uTha.en dua.en hain be-asar
phir bhi hai dil men chheḌ karen asman se ham
vo mai pila.i saaqi ne hain jis se hosh-e-gham
jagen na jagen dekhiye ḳhvab-e-giran se ham
vo sarzamin kahan ki na ho gardish-e-falak
mumkin nahin ki bach ke rahen asman se ham
aḳhir junun men mil ga.iin daman ki dhajjiyan
le aa.e un ko vadi-e-vahshat-nishan se ham
kam-ma.egi men nazil hai ijz-o-niyaz par
ab kya uTha.en sar ko tire astan se ham
kaisi chamak kahan ki khaTak uf re be-hisi
hain mast zauq-e-lazzat-e-dard-e-nihan se ham
majbur dil tha hukm-e-qaza-o-qadar se ‘shauq’
ab kya bata.en aa.e yahan phir kahan se ham
Leave a Reply