bichhDe Hain Kab Se Qafila-E-Raftagan Se Hum

bichhḌe haiñ kab se qāfila-e-raftagāñ se ham

mil jā.eñge kabhī na kabhī kārvāñ se ham

rah rah ke pūchhte haiñ yahī bāġhbāñ se ham

le jaa.eñ chaar tinke kahāñ āshiyāñ se ham

majbūr kis qadar haiñ dil-e-bad-gumāñ se ham

dekhe koī ki chup haiñ khaḌe be-zabāñ se ham

allāh re urūj-e-taḳhayyul ke hausle

chal kar makāñ se baḌh ga.e kuchh lā-makāñ se ham

bād-e-ḳhizāñ ne rañg-e-chaman kyā uḌā diyā

āḳhir ko nikle ḳhāk-basar bostāñ se ham

kis muñh se haath uThā.eñ duā.eñ haiñ be-asar

phir bhī hai dil meñ chheḌ kareñ āsmāñ se ham

vo mai pilā.ī saaqī ne haiñ jis se hosh-e-ġham

jāgeñ na jāgeñ dekhiye ḳhvāb-e-girāñ se ham

vo sarzamīñ kahāñ ki na ho gardish-e-falak

mumkin nahīñ ki bach ke raheñ āsmāñ se ham

āḳhir junūñ meñ mil ga.iiñ dāman kī dhajjiyāñ

le aa.e un ko vādī-e-vahshat-nishāñ se ham

kam-mā.egī meñ nāzil hai ijz-o-niyāz par

ab kyā uThā.eñ sar ko tire āstāñ se ham

kaisī chamak kahāñ kī khaTak uf re be-hisī

haiñ mast zauq-e-lazzat-e-dard-e-nihāñ se ham

majbūr dil thā hukm-e-qazā-o-qadar se ‘shauq’

ab kyā batā.eñ aa.e yahāñ phir kahāñ se ham

Leave a Comment