Azhar Faragh
koi bhi shakl mire dil men utar sakti hai
ik rifaqat men kahan umr guzar sakti hai
tujh se kuchh aur ta.alluq bhi zaruri hai mira
ye mohabbat to kisi vaqt bhi mar sakti hai
meri ḳhvahish hai ki phulon se tujhe fat.h karun
varna ye kaam to talvar bhi kar sakti hai
ho agar mauj men ham jaisa koi andha faqir
ek sikke se bhi taqdir sanvar sakti hai
sub.h-dam surḳh ujala hai khule paani men
chand ki laash kahin se bhi ubhar sakti hai
Leave a Reply