Nazeer Siddiqui
ḳhud-farebi ne be-shak sahara diya aur tabi.at ba-zahir bahalti rahi
ek kanTa sa dil men khaTakta raha ek hasrat si dil ko masalti rahi
apne gham ko hamesha bhulaya kiye kasrat-e-kar men sair-e-bazar men
al-gharaz kasmapursi ke aalam men bhi zinda rahne ki surat nikalti rahi
aql ki bartari dil ne maani to kya us ne chaha kabhi aql ka mashvara
dil ko jis tarah chalna tha chalta raha aql har gaam par haath malti rahi
bazm-e-hasti men aane ko aa.e sabhi ahl-e-dil ahl-e-din sha.ir-o-falsafi
aadmi ko jo karna tha karta raha aur duniya ba-dastur chalti rahi
is ki surat jo chaho badal ja.egi jaise sanche men Dhaloge Dhal ja.egi
koi sancha yahan harf-e-aḳhir nahin zindagi to hamesha badalti rahi
aadmi saath rahne pe majbur hai phir bhi ik dusre se bahut duur hai
dushmanon se to hoti bhala sulh kya jabki ḳhud doston se bhi chalti rahi
Leave a Reply