Hasan Abidi
sub.h aankh khulti hai ek din nikalta hai
phir ye ek din barson saath saath chalta hai
kuchh na kuchh to hota hai ik tire na hone se
varna aisi baton par kaun haath malta hai
qafile to sahra men thak ke so bhi jaate hain
chand badalon ke saath saari raat chalta hai
dil charagh-e-mahfil hai lekin us ke aane tak
baar baar bujhta hai baar baar jalta hai
kulfaten juda.i ki umr bhar nahin jatin
ji bahal to jaata hai par kahan bahalta hai
dil tapan nahin rahta main ghazal nahin kahta
ye sharar apni hi aag se uchhalta hai
main bisat-e-danish ka duur se tamasha.i
dekhta raha shatir kaise chaal chalta hai
Leave a Reply