Tilok Chand Mahroom
zaval-e-husn ko husn-e-nigar kya jaane
ḳhizan qadam-ba-qadam hai bahar kya jaane
likha hai us ke muqaddar men iztirab-e-davam
qarar kya hai dil-e-be-qarar kya jaane
nasib rahat-e-qurb-e-davam ho jis ko
vo lazzat-e-ḳhalish-e-intizar kiya jaane
samajh rahe hain jise sab gunahgar yahan
usi pe ho karam-e-kirdgar kya jaane
kiye pe apne ho ḳhud munfa.il bashar aḳhir
yahi ho jabr yahi iḳhtiyar kya jaane
taḌap raha huun main apne gunah gin gin kar
usi ka naam ho roz-e-shumar kya jaane
kahan ye sham-e-ghariban kahan vo sub.h-e-vatan
vo farq-e-gardish-e-lail-o-nihar kya jaane
jo paanv toḌ ke baiThe sar-e-rah-e-manzil
vo kab uThenge koi shahsavar kya jaane
ba-in kamal-e-ḳhirad kyuun hai ma.il-e-ilhad
maqam-e-‘josh’ ko ‘mahrum’-e-zar kya jaane
Leave a Reply