zavāl-e-husn ko husn-e-nigār kyā jaane
ḳhizāñ qadam-ba-qadam hai bahār kyā jaane
likhā hai us ke muqaddar meñ iztirāb-e-davām
qarār kyā hai dil-e-be-qarār kyā jaane
nasīb rāhat-e-qurb-e-davām ho jis ko
vo lazzat-e-ḳhalish-e-intizār kiyā jaane
samajh rahe haiñ jise sab gunāhgār yahāñ
usī pe ho karam-e-kirdgār kyā jaane
kiye pe apne ho ḳhud munfa.il bashar āḳhir
yahī ho jabr yahī iḳhtiyār kyā jaane
taḌap rahā huuñ maiñ apne gunāh gin gin kar
usī kā naam ho roz-e-shumār kyā jaane
kahāñ ye shām-e-ġharībāñ kahāñ vo sub.h-e-vatan
vo farq-e-gardish-e-lail-o-nihār kyā jaane
jo paañv toḌ ke baiThe sar-e-rah-e-manzil
vo kab uTheñge koī shahsavār kyā jaane
ba-īñ kamāl-e-ḳhirad kyuuñ hai mā.il-e-ilhād
maqām-e-‘josh’ ko ‘mahrūm’-e-zār kyā jaane