Irfan Hai Ye Ishq Ke Soz-O-Gudaz Ka

irfan hai ye ishq ke soz-o-gudaz ka

parda uTha raha hai koi imtiyaz ka

taron se puchhiye miri ankhon ko dekhiye

duniya ko kya pata shab-e-hijr-e-daraz ka

jaane se qabl tuur pe muusa ye dekhte

kya zarf hai havas tajalli-navaz ka

sab surḳhiyan hain ḳhun-e-vafa si likhi hui

qissa hai dil-gudaz shahid-e-niyaz ka

sar be-ḳhudi men aap ke qadmon pe jhuk gaya

aaya tha kuchh ḳhayal sa dil men namaz ka

ankhen jhuka nazar na mila dil pe tiir kha

pahla sabaq hai ishq ke raz-o-niyaz ka

mahfil men dekhte hain vo tasvir ki tarah

markaz hai har nafas nigah-e-imtiyaz ka

dekha phir us ne qalb ki phir harkaten baḌhin

zaḳhma bani hai phir nigah-e-naz saaz ka

zarf azma.e sozish-e-sad-barq-e-tur se

liije na imtihan dil-e-be-niyaz ka

‘talib’ agar nazar na ho pamal-e-ḳhvahishat

har lam.a barq-e-tur hai husn-e-majaz ka