Maqsood Afaq
ham tire alam-e-vahshat men sahare hue hain
vaqt badla to hamin pahle kinare hue hain
muntazir aaj bhi hain takte hain tera rasta
ek muddat se miyan tujh ko pukare hue hain
hijr men tere jo nikle hain miri aankh se ashk
gir paḌe jab ye zamin par to sitare hue hain
ruThne ka tire ab dukh nahin hoga ham ko
ham isi karb men ik umr guzare hue hain
kabhi ye shahr shanasa bhi hua karta tha
ab yahan sab ke sab ehsas ke maare hue hain
ne.amat-e-ishq mayassar nahin aati sab ko
sahab-e-zar bhi yahan haath pasare hue hain
Leave a Reply