Din Guzar Jata Hai Par Raat Se Ji Darta Hai

din guzar jaatā hai par raat se jī Dartā hai

chhat shikasta ho to barsāt se jī Dartā hai

phuul shāḳhoñ pe bhī murjhā ke bikhar jaate haiñ

tū ho gar saath tire saath se jī Dartā hai

ābgīne meñ ta.alluq ke na baal aa.e kahīñ

baat karte hue har baat se jī Dartā hai

chāñdnī rāteñ na aa.eñ ye duā kartā huuñ

ab to guzre hue lamhāt se jī Dartā hai

phir tamāzat tire pahlū kī jagā detī hai

niiñd meñ bhī tirī is ghaat se jī Dartā hai

Leave a Comment