ashiq-e-soḳhta-dil ḳhatt-e-sanam donon ek
jis tarah suniye juda shadi-o-gham donon ek
donon batin men agar ek hain lekin koi
ab-o-atish nahin rakhta hai baham donon ek
hai juda sajde ki ja hindu musalman ki magar
fahm valon ke ta.iin dair-o-haram donon ek
kuhl karte hain ham ankhon men barabar dono
surma-e-kor ko aur ḳhak-e-qadam donon ek
jab phansa zulf men ja dil na raha nang-o-haya
taaq par rakhiye vahan nang-o-sharam donon ek
bar-e-gham hijr paḌa sar pe kisi ke us dam
ḳhaak men diije mila aql-o-faham donon ek
evaz-e-hijr na luun aish tamam aalam ka
hai azal se mujhe farman-e-hakam donon ek
dil men arman na raha baaqi jo chaha so kiya
sair duniya ki bhi aur sair-e-adam donon ek
yaar aghosh men apne hai muhayya har-dam
bas hai ye mere ta.iin jah-o-hasham donon ek
aarzu ‘qasim-ali’ dil men nahin kuchh lekin
chahiye apne ta.iin fazl-o-karam donon ek
Leave a Reply