Hajra Noor Zaryab
jab muqaddar hi men hai tanha.i se yaari pagal
phir vahi shaḳhs hai kyuun zehn pe taari pagal
raat bhar teri tamanna ke safar men guzri
duur tak tirgi-e-rah pukari pagal
mujh ko rukne na diya meri junun-ḳhezi ne
aql kahti hi rahi fikr se aari pagal
tujh ko har sub.h ke aghaz pe socha main ne
mujh ko karti hi rahi meri ḳhumari pagal
tu ne kaghaz pe kabhi naqsh banaya tha mira
kar ga.i mujh ko vahi naqsh-nigari pagal
jhuum kar jab mire chehre pe vo lahra.i thi
tum ne kis naaz se vo zulf sanvari pagal
mera saaya hi faqat saath mire chalta hai
apne saa.e se hi rakhti huun main yaari pagal
us ne dil haar ke ‘zaryab’ mujhe jiit liya
ishq ki riit hai duniya se niyari pagal
Leave a Reply