tujhe kya ḳhabar mire ham-safar mira marhala koi aur hai
mujhe manzilon se gurez hai mera rasta koi aur hai
meri chahaton ko na puchhiye jo mila talab se siva mila
miri dastan hi ajiib hai mira mas.ala koi aur hai
ye havas ke bande hain naseha na samajh sake mira mudda.a
mujhe pyaar hai kisi aur se mira dil-ruba koi aur hai
mira zauq-e-sajda hai zahiri ki hai kashmakash miri zindagi
ye guman dil men raha sada mira mudda.a koi aur hai
vo rahim hai vo karim hai vo nahin ki zulm kare sada
hai yaqin zamane ko dekh kar ki yahan ḳhuda koi aur hai
main chala kahan se ḳhabar nahin ki safar men hai miri zindagi
miri ibtida kahin aur hai miri intiha koi aur hai
mira naam ‘darshan’-e-ḳhasta-tan mire dil men koi hai zau-fagan
main huun gum kisi ki talash men mujhe DhunDhta koi aur hai
Leave a Reply