Waheed Akhtar
tum ga.e saath ujalon ka bhi jhuTa Thahra
roz-o-shab apna muqaddar hi andhera Thahra
yaad karte nahin itna to dil-e-ḳhana-ḳharab
bhula-bhaTka koi do roz agar aa Thahra
koi ilzam nasim-e-sahari par na gaya
phuul hansne pe ḳhatavar akela Thahra
pattiyan rah ga.iin bu le uḌi avara saba
qafila mauj-e-baharan ka bas itna Thahra
roz nazron se guzarte hain hazaron chehre
samne dil ke magar ek hi chehra Thahra
vaqt bhi sa.i-e-madava-e-alam kar na saka
jab se tum bichhḌe ho ḳhud vaqt hai Thahra Thahra
dil hai vo mom mila hai jise sham.on ka gudaz
ab koi dekhe na dekhe yunhi jalna Thahra
tum ne jo sham.a jala.i thi na bujhne paa.e
ab to le-de ke yahi kaam hamara Thahra
gunguna lenge ghazal aaj ‘vahid’-aḳhtar ki
naam lena hi jo dar-parda tumhara Thahra
Leave a Reply