Poet
ruḳh nazar ka kabhi idhar na hua
dil ko hasrat rahi jigar na hua
hijr ki shab to jan-leva thi
din juda.i ka bhi basar na hua
us ke alfaz dil men chubhte hain
koi fiqra bhi be-asar na hua
bazm men sau maqam badle hain
ruḳh tumhara kabhi udhar na hua
vasl likkha tha meri qismat men
be-kasi dekhiye magar na hua
hijr ne dam pe ye bana di thi
ham se naala bhi rat-bhar na hua
umr-bhar us ki taak hi men rahe
dhyan apna idhar-udhar na hua
us ke jalve se tha jahan ma.amur
ghair ka zikr bhuul kar na hua
us ko ashiq na samjho ai ‘shankar’
jo fida us ke naam par na hua
Leave a Reply