Chhedne Hum Ko Yar Aaj Aaya

chhedne ham ko yaar aaj aaya

baare kuchh chahl par mizaj aaya

takht shahi ka kis ko bhata hai

khush hamen faqr hi ka taaj aaya

kisht-e-dil fauj-e-gham ne ki taraj

tis pe tu mangne khiraj aaya

tu ne kya kya use ba-tang kiya

le ke tujh tak jo ehtiyaj aaya

ki dava dard-e-dil ki bahuteri

raas koi na par ilaaj aaya

mar gaya kal hi ‘jurat’-e-bimar

tu ayadat ko us ki aaj aaya

Leave a Comment