vadi-e-qalb ke halat tumhen kya ma.alum
kiya sitam dhate hain jazbat tumhen kya ma.alum
tum ne har vaqt hi ḳhushiyon ke ujale dekhe
gham ki hoti hai siyah raat tumhen kya ma.alum
mere ash.ar uThate hain savalat magar
ḳhaak tum doge javabat tumhen kya ma.alum
tum hamen bhuul ga.e aish-o-tarab men lekin
ham ne bhuli na koi baat tumhen kya ma.alum
tum ne di hai vo mohabbat men dagha kya jaano
pyaar ko kaise mili maat tumhen kya ma.alum
ḳhushk honTon ne jab allah-nigahban kaha
kaise ankhon ne ki barsat tumhen kya ma.alum
tum to shadan the ki bas haar gaya hai ‘maqsud’
kis ki dar-asl hui maat tumhen kya ma.alum
Leave a Reply