Poet
fasl-e-gul aai hai kal aur hi saman honge
mere daman men tire dast-o-gareban honge
sab ye kafir hain hasinon ki na sun tu ai dil
chaar din baad yahi dushman-e-iman honge
kis tarah jaenge manea hai hamen khauf-e-mizaj
zulf pur-kham hai to kuchh vo bhi pareshan honge
girya anjam-e-tabassum hai na hans ai ghafil
khuun roenge vahi zakhm jo khandan honge
yaad aaega pas-e-marg hamara ye kamal
haal khul jaega jab khaak men pinhan honge
khana-zadon ko kahan qaid-e-mohabbat se faragh
ham vo bulbul hain yahin khak-e-gulistan honge
daur-e-har-nakhl karenge sifat-e-gard ‘nasim’
ham pas-e-marg bhi qurban-e-gulistan honge
Leave a Reply