Jaleel Aali
ik aisi an-kahi tahrir karne ja raha huun
hunar ko aur bhi gambhir karne ja raha huun
mire ehsas men bechain jis ke ḳhal-o-ḳhad hain
use har aankh men tasvir karne ja raha huun
main farhad-e-ma.ani tisha-e-harf-o-bayan se
suḳhan ki jhiil ju-e-shir karne ja raha huun
dilon ke darmiyan raston men kitne ḳham paḌe hain
main un ko phir se sidha tiir karne ja raha huun
vo jis men be-navaon ke lahu ki surḳhiyan hain
kulah-e-shah lir-o-lir karne ja raha huun
mujhe zanjirna hai apne hisse ka zamana
so apne aap ko tasḳhir karne ja raha huun
sada tabir-dar-tabir jo rakkhe safar men
main vo ḳhvab-e-digar tamir karne ja raha huun
Leave a Reply