Sahba Akhtar
yuun bhi hua ik arse tak ik sher na mujh se tamam hua
aur kabhi ik raat men ik divan mujhe ilham hua
apni tanha.i ka shikva tujh ko giroh-e-ghair se kyuun
ye to havas ka daur hai pyare jis ko jis se kaam hua
main apne ḳhaliq se ḳhush huun misl-e-ali is qismat par
daulat ahl-e-jehl ne paa.i ilm mujhe in.aam hua
kaisi qana.at kaisi ibadat hirs-o-havas ke aalam men
dil jo pahle ghar tha ḳhuda ka ab shahr-e-asnam hua
jo patthar ko mom bana de dil men ab vo aanch kahan
jis sho.ale par naaz bahut tha vo sho.ala bhi ḳhaam hua
jin ko hai islam ka da.ava ‘sahba’ un ka haal bhi dekh
main to ḳhair buton ka ho kar mahrum-e-islam hua
Leave a Reply