daam sau rakhte hain lafzon men sukhnavar mujh se
baat kijega zara soch samajh kar mujh se
mujhe khalti nahin tanhai safar ki yuun bhi
guftugu karte hain sab raah ke patthar mujh se
vo jo hain lazzat-e-tafhim-e-sukhan se vaqif
sher sunte hain vahi log mukarrar mujh se
mujh ko dar tha ki kahin fasle badh jaaen magar
vo qarib aa gaya kuchh aur simat kar mujh se
vo jo bichhda hai sukhan laut ke kab aaega
puchhte rahte hain ye shaam ke manzar mujh se
Leave a Reply