jaane kis kis ki tavajjoh ka tamasha dekha
toḌ kar aa.ina jab apna hi chehra dekha
aa lage gor kinare to mila muzhda-e-vasl
raat Duubi to ubharta hua taara dekha
ek aansu men hue gharq do-alam ke sitam
ye samundar to tire gham se bhi gahra dekha
yaad aata nahin kuchh bhi ki yahan duniya men
kaun si chiiz nahin dekhi magar kya dekha
ishq ke daagh hue mahv is ashob men sab
TimTimata sa charagh-e-ruḳh-e-zeba dekha
is ghalat-bini ka koi to natija hota
umr bhar bahr-e-bala-ḳhez ko sahra dekha
koi is ḳhvab ki ta.abir badal de ya-rab
ghar men bahta hua ik ḳhuun ka dariya dekha
kho ga.e bhiiḌ men duniya ki par ab tak ‘shohrat’
sansana uTTha hai ji jab koi un sa dekha
Leave a Reply