Dip Tha Ya Tara Kya Jaane

diip tha ya taara kya jaane

dil men kyuun Duuba kya jaane

gul par kya kuchh biit gai hai

albela jhonka kya jaane

aas ki maili chadar odhe

vo bhi tha mujh sa kya jaane

riit bhi apni rut bhi apni

dil rasm-e-duniya kya jaane

ungli thaam ke chalne vaala

nagri ka rasta kya jaane

kitne mod abhi baaqi hain

tum jaano saaya kya jaane

kaun khilauna tuut gaya hai

balak be-parva kya jaane

mamta ot dahakte suraj

ankhon ka taara kya jaane

Leave a Comment