Alka Mishra
havaon men dilon ka karvan hai
muqaddas ishq jab se mehrban hai
mire dil ko sukun aaya yahin par
baḌa maḳhsus tera astan hai
vo mujh se duur ja.ega bhi kaise
jo meri ruuh ke andar nihan hai
mohabbat ke safar par jaao lekin
vahan har moḌ par ik imtihan hai
mire dil par usi ki hai hukumat
lakiron men miri jis ka nishan hai
chhupa sakti nahin us se main kuchh bhi
mira har raaz to us par ayaan hai
firaq-o-vasl ki had se nikal kar
ajab se moḌ par ab dastan hai
milen hain chand lamhe khul ke ji len
vagarna zindagi to ra.egan hai
Leave a Reply