Abdullah Kamal
vo shakhs kya hai mire vaste sunaen use
hava men mere havale se gungunaen use
udaas raton men avara-gard banjare
hata len bansuri honton se aur gaaen use
vo mera dil hai koi ret ka gharaunda nahin
ki shokh maujen mitaen use banaen use
hai dil men dard ka lashkar padav daale hue
mile vo jan-e-ghazal to kahan sajaen use
ghazal hai naam falak par qayam hai us ka
kabhi falak se zamin par utaar laaen use
bichhad gaya to palat kar kabhi na aaega
hazar dasht-o-bayaban men do sadaen use
vo dil ka dard sahi jaan ban gaya hai ‘kamal’
ham apni jaan se jaaen to bhuul jaaen use
Leave a Reply