Swapnil Tiwari
dhire dhire Dhalte suraj ka safar mera bhi hai
shaam batlati hai mujh ko ek ghar mera bhi hai
jis nadi ka tu kinara hai usi ka main bhi huun
tere hisse men jo hai vo hi bhanvar mera bhi hai
ek pagDanDi chali jangal men bas ye soch kar
dasht ke us paar shayad ek ghar mera bhi hai
phuTte hi ek ankur ne daraḳhton se kaha
asman ik chahiye mujh ko ki sar mera bhi hai
aaj bedari mujhe shab bhar ye samjhati rahi
ik zara sa haq tumhare ḳhvabon par mera bhi hai
mere ashkon men chhupi thi svati ki ik buund bhi
is samundar men kahin par ik guhar mera bhi hai
shaḳh par shab ki lage is chand men hai dhuup jo
vo miri a.ankhon ki hai so vo samar mera bhi hai
tu jahan par ḳhaak uḌane ja raha hai ai junun
haan unhin viraniyon men ik khanDar mera bhi hai
jaan jaate hain pata ‘atish’ dhuen se sab mira
sochta rahta huun kya koi mafar mera bhi hai
Leave a Reply