jis ne mere sar par tohmat rakkhi hai
main ne us ke ghar ki izzat rakkhi hai
baat alag hai faqa-mast faqiron ki
Thokar men duniya ki daulat rakkhi hai
amrit jal le jaao ki us ne hathon men
kuaan khodne-bhar ki taqat rakkhi hai
main ne to dutkar diya sau baar use
lekin us ne meri izzat rakkhi hai
safar bahut mushkil hai paapi duniya ka
izzat ke pichhe hi zillat rakkhi hai
mazduron ko phal se kya lena-dena
un ke hisse men to mehnat rakkhi hai
ghar ke bahar bhiiḌ lagi hai mangton ki
jaise mere ghar men daulat rakkhi hai
maan ka rutba sab se uncha hai ‘sanjai’
us ke paanv ke niche jannat rakkhi hai
Leave a Reply