Rafiq Raaz
kurra-e-arz ko tarik bana dena tha
hijr ki shab men sitaron ko bujha dena tha
kitni dahshat hai mire shahr men sannaTe ki
naḳhl-e-avaz yahan bhi to laga dena tha
tu ki maujud agar misl-e-hava sehn men tha
shajar-e-jamid-o-sakit ko hila dena tha
pur-sukun kab se mire dil ka hai sahra-e-sukut
aa ke is men bhi kabhi hashr uTha dena tha
husn ke manzar-e-saffak nazar aate saaf
parda-e-ḳhvab ko ankhon se haTa dena tha
rang kuchh sub.h-e-qayamat ka alag hi hota
chehra-e-mehr se bhi rang uḌa dena tha
Leave a Reply